Three Gallus Brithers

Three gallus brithers hit the toon
Big Wullie, Shoo an Sauny Broon
rarin tae coup the bevvy doon
     an the nicht wiz Halloween.

Sauny wis mairrit years langsyne
(Jessie McGuire fae Ochtertyne)
When he wis canned he liked her fine
     an the nicht wiz Halloween.

Wullie wis guid at the boaxin yince
till he got fat oan tatties an mince.
Sundays he'll gie his physog a wee rinse
     an the nicht wiz Halloween.

Shoo wis a genius (ask his maw)
micht o been mair than naethin at aa
but the lassies aye caad his heid fae the baa
     an the nicht wiz Halloween.

Doon tae the harbour, therr's the plan
a hauf dizen bars in a hauf mile span -
three gallus brithers agreed tae a man
     an the nicht wiz Halloween.

Stert wi the Anchor, tip a jaur,
twa in the Ship, and the Harbour Bar,
stoatin an happy as pigs in glaur
     an the nicht wiz Halloween.

Efter the Harbour, the Steamboat Inn
whaur the whusky flows when the fleet comes in
an they caa ye a poof if ye esk fur gin
     an the nicht wiz Halloween.

Efter the Steamboat, shoot the craw.
Jessie'd be waitin, an Shuggie's maw.
But Wullie jist gawpt at the harbour waa
     an the nicht wiz Halloween.

"See thoan wee door, it wisna therr"
says Wullie, "Ah've spent ma life in Ayr
'n it's new. Gaunny keek inside furra dare?"
     an the nicht wiz Halloween.

So they opened the door in the harbour waa -
Guid alane kens whit they thocht they saw
but they grinned tae their lugs an said "this is braw!"
     an the nicht wiz Halloween.

Wullie jouks in the ring wi his fists in the air
an the punters aa gien it "Wullie the berr!"
but the bogle sune plants him flat oan the flerr
     an the nicht wiz Halloween.

Sauny walks doon the aisle wi his Jessie again
but the meenister says "Geeza brek, Jessie hen
ye've hud me an ma faithur an twal' ither men"
     an the nicht wiz Halloween.

An a carlin gied wee Shuggie a kiss.
"Ye're a helluva lad when ye're oot on the piss"
she says, "See in the moarn, ye'll be mindin aa this?"
     an the nicht wiz Halloween.

Noo the waa's still therr but thur's nae wee door
jist the harbour lichts affa Newton shore
an three gallus brithers as bold as before
     an the nicht wiz Halloween.